SaiTaoNum

ႁူဝ်ပဝ်ႈ (RCSS/SSA) ၸဝ်ႈယွတ်ႈသိုၵ်း လၢတ်ႈတီႈပၢင် ၵုမ်ႁူဝ်ႁုပ်ႈပီဝႃႈ တင်ႈတႄႇတူၵ်းလူင်းၵိုတ်းယိုဝ်း ႁဵတ်းလွင်ႈငမ်းယဵၼ်မႃး၊ ၾၢႆႇတႆးယင်းတိုၵ်ႉႁၵ်ႉသႃဝႆႉ လွင်ႈငမ်းယဵၼ်၊ ဢၼ်လႆႈယိုဝ်းၵၼ်မႃး တပ်ႉသိုၵ်းမၢၼ်ႈ ပဵၼ်ၾၢႆႇပူၼ်ႉပႅၼ်ဢွၼ်တၢင်း။
တင်ႈတႄႇဝၼ်းထိ 16-19/01/13 (ၶၢဝ်းတၢင်း 4 ဝၼ်း) မီးပၢင်ၵုမ်ႁူဝ်ႁုပ်ႈပီၶွင် ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆး (RCSS/SSA) ပွၵ်ႈၵမ်းထိ 13 တီႈငဝ်ႈၸိုင်ႈလွႆတႆးလႅင်း။ မီးႁူဝ်ပဝ်ႈလူင် RCSS/SSA ၸွမ်သိုၵ်းယွတ်ႈသိုၵ်း တင်းၽူႈၶဝ်ႈပႃးၼႂ်းၶွမ်ႊမတီႊငဝ်ႈၸိုင်ႈ 200 ပၢႆ ၶဝ်ႈႁူမ်ႈပႃး။

ၼႂ်းပၢင်ၵုမ်လူင် လၢႆးငၢၼ်းၵူႈလွင်ႈလွင်ႈ ဢၼ် RCSS/SSA တူင်ႉၼိုင်ႁဵတ်းသၢင်ႈမႃး။ တွၼ်ႈၵၢၼ်သိုၵ်းၼၼ်ႉ တင်ႈတႄႇ လိူၼ်ၼူဝ်ႊဝႅမ်ႊၿိူဝ်ႊ 2011 တေႃႇထိုင် လိူၼ်ဢွၵ်ႊထူဝ်ႊၿိူဝ်ႊ 2012 (ၶၢဝ်းတၢင်း 1 ပီ) RCSS/SSA လႆႈပဵၼ်ပၢင်တိုၵ်း 68 ပွၵ်ႈ၊ ယိုဝ်းၵၼ်တင်း တပ်ႉသိုၵ်းမၢၼ်ႈၵမ်ႈသိုဝ်ႈ 44 ပွၵ်ႈ၊ ၼွၵ်ႈသေၼၼ်ႉ ယိုဝ်းၵၼ် တင်းၸုမ်းပီႇတုၸိတ်ႉ။ တိလႆႈၵွင်ႈ လၢႆသႅၼ်း 69 လဝ်း၊ ၾၢႆႇၽူႈၶဵၼ်တၢႆ 113 ၊ ဝၢတ်ႇၸဵပ်း 129 ၵေႃႉ- ၼႆယဝ်ႉ။

ၵပ်းၵၢႆႇလွင်ႈၼႆႉ ႁူဝ်ပဝ်ႈလူင် RCSS/SSA ၸဝ်ႈယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းဝႃႈ- တင်ႈတႄႇႁဝ်းလႆႈတူၵ်းလူင်းၵိုတ်း ယိုဝ်းၵၼ်တင်းလူင်ပွင်ၸိုင်ႈတဵင်းၸဵင်ႇ ဝၼ်းထိ 02/12/11 မႃးၼႆႉ 1.ႁဝ်းယင်းတိုၵ်ႉပႂ်ႉပႃး ႁၵ်ႉသႃၶေႃႈၵိၼ်ၵႅၼ်ႇ ဢၼ်ဝႆႉၸွမ်းၵၼ်မႃးႁၢၼ်ႉတေႃႇမိူဝ်ႈလဵဝ်၊ ဢမ်ႇလႆႈပူၼ်ႉပႅၼ်။ တင်ႈတႄႇၼၼ်ႉမႃး ၾၢႆႇႁဝ်းဢမ်ႇမီးလွင်ႈႁဵတ်းသိုၵ်းမုတ်း ပႂ်ႉမူၵ်းတိုၵ်း ၸွမ်းၵဵဝ်ႇ/ ၸွမ်းတၢင်း/ တၢင်းလူင်။ 2.ဢမ်ႇလမ်ၶဝ်ႈတိုၵ်း တပ်ႉပၢင်သဝ်းမၢၼ်ႈ ဢမ်ႇဝႃႈၼႂ်းဝဵင်းၼွၵ်ႈဝဵင်း ၸိူဝ်းၼႆႉ။ ဢၼ်လႆႈပိုတ်းယိုဝ်းၵၼ်မႃးတေႃႇမိူဝ်ႈလဵဝ် ပဵၼ်ပွတ်းဝၢၼ်ႈၼွၵ်ႈလွၼ်ႉလွၼ်ႉ၊ ၵွပ်ႈၾၢႆႇတပ်ႉသိုၵ်းမၢၼ်ႈပူၼ်ႉ ပႅၼ်ၶဝ်ႈမႃး ၼႂ်းၼႃႈလိၼ်ႁဝ်းၵုမ်းၵမ် ဢွၼ်တၢင်း ၸင်ႇလႆႈယိုဝ်းၵၼ်။ ၵဵဝ်ႇလူၺ်ႈလွင်ႈၼႆႉ ၾၢႆႇတပ်ႉသိုၵ်းမၢၼ်ႈဢမ်ႇ ၸၢင်ႈၼႄးဝႃႈ ၾၢႆႇႁဝ်းပူၼ်ႉပႅၼ်- ဝႃႈၼႆ။

ၸဝ်ႈယွတ်ႈသိုၵ်းယင်းလၢတ်ႈထႅင်ႈဝႃႈ- တႄႇဢဝ်ၼႆႉၵႂႃႇ ႁဝ်းတေလႆႈတိတ်းတေႃႇၵၼ် ဝႆႉၼမ်ႉၼၵ်းတင်းတပ်ႉသိုၵ်း မၢၼ်ႈ၊ ၼင်ႇႁိုဝ်ႁဝ်းတင်းၶဝ် တေမီးလွင်ႈၸမ်ၸႂ်ၵၼ်မႃးလိူဝ်ၵဝ်ႇ။ ၵွပ်ႈဝႃႈ ၵႃႈၵွၼ်ႇပူၼ်ႉမႃး ႁဝ်းဝႆႉၼၵ်း ၾၢႆႇလူင်ပွင်ၸိုင်ႈ ၵူၺ်း- ဝႃႈၼႆ။

ၼွၵ်ႈသေၼၼ်ႉ ပၢင်ၵုမ်ၶွပ်ႈၶူပ်ႇ/ႁူဝ်ႁုပ်ႈပီ RCSS/SSA ဢွၵ်ႇၶေႃႈပိုၼ်ၽၢဝ်ႇဝႆႉဝႃႈ- (1)ၵၢၼ်ၵိုတ်းယိုဝ်းၵၼ်တင်း လူင်ပွင်ၸိုင်ႈတဵင်းၸဵင်ႇၼၼ်ႉ တေၶတ်းၸႂ်ႁၵ်ႉသႃပႂ်ႉပႃး ယႃႇႁႂ်ႈပဵၼ်ယွၼ်ႉ တၢင်းၽိတ်းၾၢႆႇ (RCSS/SSA) လႄႈလုလႅဝ် ၵႂႃႇ။

(2)ၸုမ်းၽဵဝ်ႈမူၺ်ႉယႃႈမဝ်းၵမ် (RCSS/SSA) တေႁူမ်ႈမိုဝ်းတင်း လူင်ပွင်ၸိုင်ႈတဵင်းၸဵင်ႇလႄႈ ၸုမ်း UNODC သေၵႅတ်ႇ ၶႄၽေးယႃႈမဝ်းၵမ်။ ဢဝ်ၵၢၼ်ၽုၵ်ႇသွမ်ႈတူၼ်ႈ တႅၼ်းတၢင်ယႃႈမဝ်းၵမ်သေ ပူၵ်းပွင်ၵူၼ်းမိူင်း၊ ၼင်ႇႁိုဝ်ၵူၼ်းမိူင်းၸၢဝ်း ႁႆႈ ၸိူဝ်းၽုၵ်ႇယႃႈတေဢမ်ႇလႆႈပိုင်ႈဢိင် ယႃႈမဝ်းၵမ်သေႁဵတ်းၵၢၼ် ပဵၼ်ၵၢၼ်ႁႃလဵင်ႉတွင်ႉ၊ ၼင်ႇႁိုဝ်ၵူၼ်းမိူင်းတေဢမ်ႇ လႆႈပဵၼ်ယိူဝ်ႇပဵၼ်ၶႃႈ ယႃႈမဝ်းၵမ်ၼၼ်ႉ တေပူၵ်းပွင်ပၼ် ႁႂ်ႈႁူႉၽေးၶဵၼ်ယႃႈမဝ်းၵမ်။

(3)တေၶတ်းၸႂ်ၵပ်းသိုပ်ႇတိတ်းတေႃႇပႃႇတီႇၵၢၼ်မိူင်းလႄႈ ၸုမ်းယိပ်းၵွင်ႈၵၢင်ႇႁဵတ်းလၢႆးလုၵ်ႉၽိုၼ်ႉၵူႈၸုမ်းႁႂ်ႈပေႃး မီးလွင်ႈၸမ်ၸႂ်ၵၼ်လႄႈၽွမ်ႉႁူမ်ႈၵၼ်၊ တေဢဝ်လွၵ်းလၢႆးၵၢၼ်ဢုပ်ႇဢူဝ်းသေၵႄႈလိတ်ႈပၼ်ႁႃၵႂႃႇ။

(4)တေၶတ်းၸႂ်ၶႂၢၵ်ႈၼႃႈၵၢၼ်ပၢႆးမၢၵ်ႈမီးၶွင်မူႇၸုမ်း ႁႂ်ႈၵႂၢင်ႈၶႂၢင်ၶိုၼ်ႈယႂ်ႇၵႂႃႇ။

(5)တေပၼ်ႁႅင်းႁႂ်ႈၵူၼ်းမိူင်းမီးလွင်ႈလွတ်ႈလႅဝ်းထၢင်ႇႁၢင်ႈႁဵတ်းၵၢၼ်ႁႃလဵင်ႉတွင်ႉထုၵ်ႇမၢႆမီႈလွတ်ႈလွတ်ႈ လႅဝ်းလႅဝ်း။ ပူၼ်ႉမႃးမိူဝ်ႈဝၼ်းထိ 05/01/13 ဢၼ်တပ်ႉသိုၵ်းၸိုင်ႈတႆး SSA ပဵၼ်ပၢင်တိုၵ်းၵၼ်တင်းသိုၵ်းမၢၼ်ႈ တီႈၵၢင်လွႆၼၵႃး ၼႂ်းၵိင်ႇၸႄႈဝဵင်းႁူဝ်မိူင်းၼၼ်ႉ ဢမ်ႇၼပ်ႉသွၼ်ႇပႃးၼႂ်း 68 ပွၵ်ႈ၊ ၵွပ်ႈဢမ်ႇၶဝ်ႈပႃး ၼႂ်းၶၢဝ်းတၢင်းၼိုင်ႈပီ တင်ႈတႄႇ လိူၼ်ၼူဝ်ႊဝႅမ်ႊၿိူဝ်ႊ 2011 တေႃႇထိုင် လိူၼ်ဢွၵ်ႊထူဝ်ႊၿိူဝ်ႊ 2012 ။ ပၢင်တိုၵ်းတီႈလွႆၼၵႃးၼႆႉ လႆႈႁူႉဝၢႆးလိုၼ်းထႅင်ႈဝႃႈ ၾၢႆႇသိုၵ်းမၢၼ်ႈတၢႆ 2 ၵေႃႉ၊ ဝၢတ်ႇၸဵပ်း 2 ၵေႃႉsource from mongloi